ጽውጽዋይ
ብሚካል ፍጹም 7A
እቲ ሰራቒ ሰብኣይ
ሓደ እዋን፡ ኣብ ሓንቲ ንእሽቶ ዓዲ፡ ሓደ ንጉስ ነበረ። እቲ ንጉስ ኣዝዩ ሃብታምን ህዝቡ ዚፈቱን ነበረ። ግን ሓደ ሰብኣይ ብሃብቱ ዝቐንኣሉ ነበረ። ሓደ መዓልቲ፡ እቲ ንጉስ ኪገይሽ ኢሉ ኣዋርቑ ሓብኦ። ነቲ ኣዋርቕ ኢናኣቐመጦ ከሎ፡ እቲ ቀናእ ሰብኣይ ረኣዮ። እቲ ንጉስ ምስ ገሸ፡ እቲ ሰብኣይ ነቲ ገዛ ሰይሩ ነቲ ኣዋርቕ ወሰዶ።
ድሕሪ ሓደ ሰሙን፡ እቲ ንጉስ ናብ ግዝኡ ተመልሰ። ናብታ ዝሓብኣላ ቦታ ከይዱ ከኣ ኣዋርቑ ረኣየ፡ ግን ዋላ ሓንቲ ኣይጸንሖን። ብእኡ ሐሪቑ ከኣ ንቤት ፍርዲ ነገሮም። ሽዑ እቶም ቤት ፍርዲ ከምዚ በሉዎ፡- "ሓንቲ ጨናን ሓንቲ ኣድግን ኣምጸእ።" እቲ ንጉስ ሓንቲ ኣድግን ሓንቲ ጨናን ኣምጽአ። ሽዑ ነታ ኣድጊ ኣብ ጭራኣ ጨና ገበሩላ። ብድሕሪኡ ነቶም ዓዲ ኣከቦም። ከምዚ ከኣ በሎም፡-" ንብረት ተሰሪቑኒ ኣሎ'ሞ ሕጂ መን ከም ዝሰረቓ ክፈልጥ ደልየ ኣለኹ። ኵሉ ሰብ ኣብዛ ገዛ ኣትዩ ነታ ኣድጊ ጭራኣ ኪሕዛ ኢዩ። ሰራቒ እንተ ሒዙዋ ክትነጥር ኢያ። ስለዚ ኵልኹም በብሓደ ኣቲኹም ጭራኣ ሓዝዋ።" ኵሎም ሕራይ ኢሎም፡ በብሓደ ኣትዮም ሓዝዋ። ብድሕሪኡ ነቲ ሰራቒ ሰብኣይ ሪጋ በጽሖ። ኣብታ ገዛ ምስ ኣተወ፡ "እዋእ! እንታይ ገዲሹኒ ኢየ ዝሕዛ፡ ስቕ ኢለ ዘይወጽእ፡" በለ። ስቕ ኢሉ ከኣ ወጸ። ኵሎም ምስ ወድኡ፡ እቶም ፈረድቲ ኣእዳዎም ጨነውዎም። ናይ ኵሎም ጨና ነበሮ፡ ናይ'ቲ ሰራቒ ግን ጨና ኣይነበሮን። ሽዑ እዚ ኢዩ ሰራቒ በሉዎ። ብድሕሪኡ ነቲ ኣዋርቕ መለሰሉ። ንሱ ከኣ ተኣስረ፡ ይብሃል።
