ኣብ ዝሓለፈ ክረምቲ፡ ንመጽናዕቲ ናብ ኤርትራ ኬድና ኔርና። ኣብ ዝገበርናዮ መጽናዕቲ እቲ ኣውራ ዘተኰርናሉ፡ ትምህርትን ታሪኻዊ ቦታታትን ኢዩ። ኣብዚ እዋን'ዚ ኣብ ኤርትራ ሓዲሽ ስርዓተ-ትምህርቲ ይወጽእ ኣሎ። ገና'ውን መጽናዕትታት ይገብሩ ኣለዉ። እዚ ሓዲሽ ካሪክለም ኣብ ግብሪ ውዒሉ ውጽኢቱ ምስ ተራእየ፡ ካልእ መጽናዕቲ ጌርና ጸብጻብ ከነቕርበልኩም ተስፋ ኣሎና። ሕጂ ግን ኣተኵሮና ኣብ ታሪኽ ትምህርቲ ኣብ ኤርትራ፡ ምድላው መምህራን ብሓፈሻ፡ ምድላው መምህራን ቋንቋ ኣደ ድማ ብፍላይ ኢዩ።

መምህር ገብረልዑል

መምህር ገብረልዑል ወልደጽዮን ይብሃሉ።

ዕድሚኦም ካብ 85 ዓመት ዘይውሕድ ወላዲ ኢዮም።

ሓደ ካብ እቶም ቀዳሞት መምህራን ኤርትራውያን ኢዮም።

ምምህርና ዝጀመሩሉ ኣገባብ ኪገልጹ ከለዉ፡ ትምህርቲ ትግርኛ ኣብ ኤርትራ ኣብ ዝተጀመረሉ እዋን፡ ኪምህሩ ካብ ዝተመርጹ ሓደ ምንባሮም ይሕብሩ። ሽዑ መምህር ኪኸውን ዚኽእል፡ ምንባብን ምጽሓፍን ጥራይ ዚኽእል ሰብ ነበረ ይብሉ። ንሶም ድማ ኬንብቡን ኪጽሕፉን ይኽእሉ ነበሩ። ስለዚ ከም መምህር ተመርጹ።